nasīb āzmāne ke din aa rahe haiñ qarīb un ke aane ke din aa rahe haiñ
jo dil se kahā hai jo dil se sunā hai sab un ko sunāne ke din aa rahe haiñ
abhī se dil o jaañ sar-e-rāh rakh do ki luTne luTāne ke din aa rahe haiñ
Tapakne lagī un nigāhoñ se mastī nigāheñ churāne ke din aa rahe haiñ
sabā phir hameñ pūchhtī phir rahī hai chaman ko sajāne ke din aa rahe haiñ
chalo 'faiz' phir se kahīñ dil lagā.eñ sunā hai Thikāne ke din aa rahe haiñ
dil meñ ab yuuñ tire bhūle hue ġham aate haiñ jaise bichhḌe hue kaabe meñ sanam aate haiñ
ek ik kar ke hue jaate haiñ taare raushan merī manzil kī taraf tere qadam aate haiñ
raqs-e-mai tez karo saaz kī lai tez karo sū-e-mai-ḳhāna safīrān-e-haram aate haiñ
kuchh hamīñ ko nahīñ ehsān uThāne kā dimāġh vo to jab aate haiñ mā.il-ba-karam aate haiñ
aur kuchh der na guzre shab-e-furqat se kaho dil bhī kam dukhtā hai vo yaad bhī kam aate haiñ
guloñ meñ rañg bhare bād-e-nau-bahār chale chale bhī aao ki gulshan kā kārobār chale
qafas udaas hai yaaro sabā se kuchh to kaho kahīñ to bahr-e-ḳhudā aaj zikr-e-yār chale
kabhī to sub.h tire kunj-e-lab se ho āġhāz kabhī to shab sar-e-kākul se mushk-bār chale
baḌā hai dard kā rishta ye dil ġharīb sahī tumhāre naam pe ā.eñge ġham-gusār chale
jo ham pe guzrī so guzrī magar shab-e-hijrāñ hamāre ashk tirī āqibat sañvār chale
huzūr-e-yār huī daftar-e-junūñ kī talab girah meñ le ke garebāñ kā taar taar chale
maqām 'faiz' koī raah meñ jachā hī nahīñ jo kū-e-yār se nikle to sū-e-dār chale
