nasīb āzmāne ke din aa rahe haiñ qarīb un ke aane ke din aa rahe haiñ
jo dil se kahā hai jo dil se sunā hai sab un ko sunāne ke din aa rahe haiñ
abhī se dil o jaañ sar-e-rāh rakh do ki luTne luTāne ke din aa rahe haiñ
Tapakne lagī un nigāhoñ se mastī nigāheñ churāne ke din aa rahe haiñ
sabā phir hameñ pūchhtī phir rahī hai chaman ko sajāne ke din aa rahe haiñ
chalo 'faiz' phir se kahīñ dil lagā.eñ sunā hai Thikāne ke din aa rahe haiñ
Comments